Zur heurigen Weinlese ein Gedicht von Helmut Metzger im Pfälzer Dialekt.
Die Rotwein-Maus
En Bottich, der is gfillt mit Wein,
un do blumbst grad a Maisel nein.
Mein Gott en nasser Tod, der droht em
im große Meer aus Wein, aus rotem!
Des Meisel strampelt, workst un schlickt,
doch schließlich ist es ihm geklickt,
im nassa Element, im kalte
sich iwer Wasser... äh Wein zu halte!
Schnell möchte die Maus zurück ans Land,
doch wie se hikummt an de Rand,
hockt mit Kralle an de Tatz
e grosse, scheckisch bunti Katz!
Die Maus verschreckt un schwimmt zurick,
Un schlorbst vor Angscht noch zwä drei Schlick.
"S is gut" denkt unser Maisel dann,
daß so a Katz nit schwimma kann!
Solang ich in dem Bottich schwimm,
do isch die Sach noch halb so schlimm!
Doch unser Katz denkt: "Ich bin gscheit und kann
aa warte! Ich hab Zeit!"
Die Maus wir müd, ehr Glieder schwer.
Kee Wunder, in dem Rotwein-Meer!
Ersaufe möchte se nit im Wein,
doch wenn schun mol muss gstorba sein,
dann liewer dorch en Katzebiß,
weil des "maus-standgemäßer" is!
Drum piepst se: "Liewe Katz do draus,
mei Kraft loßt noch, des Spiel is aus!
Ersaufe will ich nit do hinn...
Nee liewer in deim Mage drin!
Die Katz sagt: "Los, mach kee Finesse,
denn "Maus in Weinsoß' ist mei Fresse!"
Doch's Maisel ruft, blaß wie ein Rettich-:
"En allerletschti Bitt noch hett ich:
Ich spier den Wein von all der Hatz;
wenn ich an Land geh, liewi Katz,
dann dormel ich ganz ferchterlich,
un do davor schenier ich mich.
Drum bitt ich dich in aller Ruh:
Petz grad mol schnell die Auche zu.
Solang bloß, bis ich rausgekroche,
dann bin ich dei mit Haut und Knoche!
Die Katz voll Freud uff Maus-Raguh
sagt: "gut, ich mach die Auche zu!"
Doch wie se nochher leis und sacht
die Auge wieder uffgemacht,
war's Maisel längscht schun in de Gänge
zum sichre Mauseloch, dem enge.
Die Katz kummt her ans Loch gekroche:
"Du hoscht mir doch so fest versproche,
daß ich die fresse derf sofort,
warum stehst nimmi zu deim Wort?"
Do sagt mei Maisel pfiffig druff:
"Wäscht, mer verspricht halt viel im Suff!"
Schönes Wochenende wünscht Euch Natascha
05.10.2007, 22:40
